Plantun de Prouvènço

Pèr coumpara dos planto d'encò nostre

Ambrosia psilostachya & Plumbago europaea

Ambrosia psilostachya

Asteraceae Compositae

Nom en français : Ambroisie à épis grêles.

Descripcioun :
L'ambròsi-dis-espigo-primo trachis dins li sablo, souvènt pas trop liuen de la mar o dis oustau. Sèmblo proun à sa cousino di fueio d'artemiso, Ambrosia artemisiifolia, pamens es uno planto renadivo que fai un rizoumo dins la sablo o lou limas. Apoundèn que flouris mai d'ouro e que douno d'enflourejado pu courto.

Usanço :
La planto èi forço alergogèno e pèr acò se dèu d'èstre derrabado. D'estùdi s'interèsson pamens i prouprieta antimicroubiano de l'isabelino, mouleculo secretado pèr la planto que poudrié servi dins la lucho contro li baterìo encò l'ome.

Port : Erbo
Taio : 10 à 60 cm
Fueio : alterno
Tipe bioulougico : Geoufite
Cicle bioulougico : Planto renadivo

Gènre : Ambrosia
Famiho : Asteraceae
Famiho classico : Compositae
Tribu : Heliantheae
Ordre : Asterales

Coulour de la flour : Verdo
Petalo : >6
Ø (o loungour) enflourejado : 6 à 10 cm
Flourido : Printèms - Estiéu

Sòu : Ca (Si)
Autour basso e auto : 0 à 200 m
Aparado : Noun
Remarco : Planto envahissènto
Jun à setèmbre

Liò : Sablo - Escoumbre e proche dis oustau - Ermas - Culturo
Estànci : Mesoumediterran à Coulinen
Couroulougi : Óurigino Americo dóu Nord
Ref. sc. : Ambrosia psilostachya DC., 1836

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.